Versi in vernacolo arianese di Luigi Pietrolà attinenti al periodo di Natalizio e alla crisi economica che vive la nostra società:

E accussi è arrivato Natale ,
poche luci e senza riale
simu custretti a  sparagnà.
manco l’albero avima appiccia’ ,
e accussi’ mo pi sti  feste
 nun ci putimo manco veste,
picchè è scuppata la magagna ,
stamo come la  grecia e  la  spagna,
so finuti li tiempi belli
 ca si rialavano pillicce e giuielli,
cillulare , vistiti e profumo,
e si pinsava a lu consumo,
mo’ si torna a la tradizione,
 e si riscopre la riligione.
S’adda turnà a lu  vero  Natale,
come eva prima tale e quale,
ca nun ci steva niente di chiù bello
di la nascita di lu bambinello,
si cantava tu scendi dalle stelle,
nnanz lu presepio cu li sparachelle,
e doppo la messa di mezzanotte
si sparavano roie botte
e di li criature la  meraviglia,
eva la gioa di la famiglia,

E arrivata mo di stà crisi,
 stamo n’ata vota accisi,
 ma ca chiuirino li fabbriche e mannino l’operai
..qua nu l’amu vistu mai,
tanto a nui l’icunumia,
 s’acconza sulu si ziculeia,
 si la crisi addiventa grossa,
 allora spiriamo a n’ata scossa,
ma pi mò , lu prublema…
eia ca qua, ancora nun trema,
e  si no, resta la spiranza,.
. di li rifiuti l’ emergenza,
e c’arriva la salvezza,
 cu cocche camion di munnezza,
ma lu vascone di savignano
,.. staie nu chilometro luntano,
si vulemmo fa lu buttino,
 s’eva spustà ‘ndà lu cunfino,
invece accussì a nui li spese…
 e loro s’acconsano lu paese.

Prima, tutti hanno fravicato
 cu li soldi di lu stato,
hanno pigliate li dicrete
…e mo  si mangiano li prete,
li case nove stanno vacante
..e stanno ca chiangino tutti quante,
e ‘ndà sti ville, cu tavernetta e cantina
 ..mo’  criscitice cocche gallina,
ca ti vene a ribbulezza,
 quanno si paia imu e  munnezza,
puru chi tene na cosa stipata,
 campa sulu a la iurnata ,
visto ca li sacchi s’hanno stritti,
 nun si fuie chiu a woll stritt,
 hanno capito la situazione,
 e stipano sotto lu matone,
manu male ca qua bascio ,
 stamo ancora ‘nda la rascia,
na fella di pane e na ‘nsalata,
 e t’appari la iurnata,

A nui  a lu miridione,
 ci salva ancora cocche pinsione
E manu male ca ‘ndà tanta uaie,
 s’è allungata la vicchiaia,
e tutti quiri di la terza ità,
 a li giuvini ranno a mangià,
e ti n’accuorgi a stu sdravinario,
 nnand a la posta a lu calivario,
lu viecchio nn’anz , li parienti arreto,
 a sicondo di li lettere di l’alfabeto,
 da lu primu iuorno di lu mese,
 quanno ancora nun eia lucese,
staie na folla di pirsune,
 quanno si siggino li pinsiuni,
accompagnati da li niputi ,
 stanno tutti nfriddigliuti,
attaccata ‘nda na mulletta ,
 tienino strenta la libbretta,
e li tienino cari sti vicchiarielli,
 come si fussiro giuielli,
 fino a quanno ci stanno li buoni
 o li bot e li pinsiuni,,
e po’ n’ato cumplimento,
 si tienino puru l’accumpagnamento.

Ma quanno si ni vaie la salute
 o si diventa ‘nsallanute,
andò a sparte ni so tante…
 li mittino subbitu la badante,
e pi cangià li pannuline…
c’addda pinsà cocche ucraine,
ma finchè lu viecchio rispira,
 mo’ scorre l’euro e prima la lira,
e  face commodo a lu guverno,
 quanno li chiama li patiterno,
ma paricchi, lu decesso,
 lu dichiarano lu mese appriesso,
e doppo ca l’hanno accumpagnato,
 vanno a caccià lu certificato,
sti puvirielli nun puonno manco spirì,
 prima ca lu mese vaie a trasì,
picchè si muorino prima c’hanno siggiuto,…..
 sa quanta rifrischi c hanno avuto,
e puru roppo rubricate
cu li soldi  ca s’hanno pigliate
s’abbia subbitu lu picchio
a chi tocca paià lapide e nicchio,
e fanno sciarra frate e sore
pi li spese di  lu murtore,
e doppo sprimuti come a li limuni
puru si l’hanno fatto truvà libbretta e buoni,
li parienti e li niputi cu lu portafoglio chino chino..
………nu l’appicciano manco nu lampino.

 Pietrolà Luigi          Natale 2013

* E' crisi. Per la foto di copertina abbiamo riciclato quella del dicembre 2006.  :-)